18 يونيو 1996، وتحت شعار كرة القدم تعود لموطنها ابتدت قصة بين صبي مصري وبين منتخب اتخلق علشان يجيب لكل مشجعيه سكته دماغية، منتخب إنجلترا، حلقة النهاردة مش عن حادثة أو منتخب أو حاجة تخص المونديال، حلقة النهاردة عن مشوار مأساوي مؤلم مليان وجع قلب مع مشجع مصري اتعلق قلبه في لحظة طيش بمنتخب إنجلترا.

ليه 18 يونيو 96، في السنه دي وتحت شعار كرة القدم تعود لموطنها أقيمت منافسات يورو 96 في إنجلترا ولأول مرة يقرر الإتحاد الأوروبي إن البطولة يصعد ليها 16 فريق بدلا من 8 في النسخة الأخيرة اللي فازت بيها الدنمارك واتعملت في السويد سنه 92 واتكلمنا عنها في السلسلة.

في البطولة دي أنجلترا جت قرعتها في المجموعة الأولى وكان معها هولندا وسويسرا واسكتلندا اللي كانت من أغلس الفرق في الكرة الأرضية اللي بتلعب كورة، في البداية كده تعالى نقول تشكيل منتخب إنجلترا في البطولة دي ” ديفيد سيمان” حارس مرمى، سول كامبل وجاري نيفيل بول إنس، توني أدمز ديفيد بلات بول جاسكون جيمي ريدناب ليس فيردناند إيان والكر روبي فالور ستيف ماكمانامان ستيوارت بيرس نيك بارمبي وطبعا جاريث ساوثجيت ” المدير الفني الحالي للمنتخب” ومعاهم العظيم آلان شيرر والعظيم تيدي شرينجهام.

دي التشكيلة اللي بسببها وقعت في غرام المنتخب الإنجليزي العتيد، وطبعا اتضاف ليهم لعيبة تانية ها يجي وقتها ونذكرهم، المهم إنجلترا كالعادة بتقدم ماتش منيل قدام سويسرا وبتتعادل 1-1 في افتتاح البطولة، في الوقت اللي القدر بيكون رحيم بينا وتتعادل هولندا قدام اسكتلندا بدون أهداف واحنا نكسب اسكتلندا وهولندا تكسب سويسرا بنفس النتيجة 2-0، وبكده بتتقاسم إنجلترا وهولندا المركز الأول وباقي ماتش بينهم يحدد مين أول المجموعة.

ده الماتش اللي أتلعب يوم 18 يونيو 96، وقبل ما اقولك نتيجة الماتش التاريخية، خليني بس اقولك منتاخب هولندا وقتها كان فيه مين خد عندك ” فان در سار ” حراسة المرمى، سيدورف، ستام، دي بور، كلايفرت، ديفيدز، بيركامب، وينتر، كوكو، هيسب، بإختصار هذا جيل من أفضل أجيال هولندا في كوره القدم.

أما نتيجة المباراة فكانت 4-1 لإنجلترا اللي قدمت أفضل وأجمل وأمتع ماتش كورة شوفته لمنتخب إنجليزي في تاريخ تشجيعي للكورة من يوم ما بدأت في 94 لغاية النهاردة، تيدي شرينجهام وألان شيرر قسموها سوا، شيرر يجيب الأول شرينجهام يجيب التاني شيرر التالت شرينجهام الرابع، وباترك كلايفرت جاب جون هولندا الوحيد.

خرجت من الماتش ده وعندي إعتقاد راسخ إن إنجلترا هي بطلة النسخة دي وفعلا بتلعب ربع النهائي قدام اسبانيا وبتصعد لنص النهائي بضربات الجزاء علشان تخبط في المنتخب الألماني جيل ممد شول اللي هما بيقولوا عليه محمد شول وتوماس هاسلر و كلينسمان وبدايات أولفر كان، وهنا بتخسر إنجلترا بضربات الجزاء بعد ما خلص الوقت الأصلي 1-1، وهنا برضو بدأ العداء التاريخي بيني وبين المنتخب الألماني المستمر للأبد، في البطولة دي بياخد آلان شيرر لقب الهداف، وبقع في حب إنجلترا.

كأس العالم فرنسا 98 أول كأس عالم بنظام 32 منتخب لان أخر نسخة 94 كانت بمشاركة 24 منتخب بس، المهم إنجلترا بتوصل كأس العالم وتلعب في المجموعة السابعة ومعاها رومانيا وكولومبيا وتونس، تشكيلة إنجلترا كان اتضاف ليها لعيبة مهمين جدا وخرج منها ناس تانية خلينا نقول ابرز الأسماء كده سريعا في تشكيلة إنجلترا لمونديال 98.

” ديفيد سيمان لحراسه المرمي، صخرتين دفاع وهما ” سول كامبل والوافد الجديد ريو فرديناد، وعلى الأجناب في الوافد الجديد برضوا  لو سو وجاري نيفيل ومعاهم في الدفاع ساوثجيت وتوني أدمز ، وخط الوسط بتنويعاته ها تلاقي إنس وباتي وماكمانامان وميرسون والجداد بول سكولز وروب لي والشاب الجديد جدا ديفيد بيكهام، في الهجوم آلان شيرر تيدي شرينجهام وليس فيرديناند ومعاهم الإضافة القوية مايكل أوين.

منتخب بتشكيلة تاكل اللحمة نية، لكن تخسر ماتش رومانيا وتصعد تاني المجموعة بعد رومانيا علشان تلاعب الأرجنتين بجيلها العظيم المظلوم جدا اللي كان فيه أورتيجا وباتيستوتا وزانيتي وكريسبو وتتعادل إنجلترا مع الأرجنتين 2-2 ونلعب ضربات ترجيح علشان يضيع بول إنس الضربة التانية ويضيع ديفيد باتي الضربة الخامسة ويضيعنا معاها ونخرج من كأس العالم بتشكيل ذهبي مش ها نعرف نجيب زيه تاني او هكذا كنت اعتقد.

أمم أوروبا 2000 في هولندا وبلجيكا أسوأ بطولة شوفت فيها منتخب إنجلترا بص احنا كنا في المجموعة الأولى وكان معانا البرتغال ورومانيا وألمانيا، اختصارا للهيصة دي كلها إحنا فوزنا ماتش وحيد وهو ماتش ألمانيا بجون آلان شيرر، وعملنا ماتش حلو مع البرتغال اللي كانت بتلعب بجيل لويس فيجو ونانو جوميز وكونسيساو وخسرنا 3-2، وخسرنا بنفس النتيجة من رومانيا علشان ناخد ألمانيا من إيدها ونخرج سوا من البطولة وتصعد البرتغال بتسعة نقاط كاملة ورومانيا تصعد ب 4 نقط، وساعتها تعلمت الدرس الأهم في تشجيع المنتخب الإنجليزي، الفرحة عمرها قصير، وبتموت بالحصبة بدري لو بتشجع إنجلترا.

كأس العالم كوريا واليابان 2002، أسوأ وابوخ واغلس وأضعف كأس عالم رأته عيني، كفاية بس اقولك إن التالت كان منتخب تركيا والرابع كان منتخب كوريا الجنوبية علشان تعرف حجم المأساة، كأس عالم من كتر سخافته اللي خد جايزة أحسن لاعب كان أولفير كان حارس مرمى ألمانيا، في الكأس ده ودعت البرازيل للأبد لانها تقريبا بطلت تلعب كورة من بعده وبقت بتصنع جواكت جلد.

المهم كالعادة منتخب إنجلترا بيمشي منه ناس وأهمهم الأخوان نيفيل وآلان شيرر، ويتضاف عليه ناس وأهمهم أشلي كول وجو كول وهيرجريفز وأميل هيسكي بياخد فرصة أكبر على حساب شرينجهام العجوز، وتقدم إنجلترا أداء مقرف حزين في الدور الأول بتعادل مع السويد 1-1 وفوز ممل على الأرجنتين 1-0 وتعادل سلبي مع نيجيريا ونصعد تاني مجموعة مع السويد والأرجنتين ترجع بلدها هي ونيجيريا.

في دول ال16 أخيرا بنعمل ماتش حلو قدام الدنمارك ونكسب 3-0، ونلاعب البرازيل في دور ال 8، طبعا معروفة إننا خسرنا من البرازيل بعد ما كنا متقدمين عليها 1-0 يجي ريفالدو يلزقنا جون في نهاية الشوط الأول وبداية الشوط التاني يلزقنا رونالدينيو الجون التاني ونروح بدري، وتكمل البرازيل وتاخد الكأس بفضل الثلاثي ريفالدو رونالدو رونالدينيو.

كأس العالم 2006، لو كان منتخب إنجلترا 96 هو الجيل الذهبي للإنجليز فمنتخب 2006 هو إمتداده، إنسي بقى الأجيال القديمة وتعالي نركز في التشكيله اللي حطها المدرب السويدي أريكسون للمنتخب، خد عندك ” ديفيد جيمس وبول روبنسون ومعاهم كارسون” دول حراسه المرمى، الدفاع بقى ” جاري نيفيل رجع للمنتخب تاني وأشلي كول وجون تيري وريو فردينياد وجيمي كاراجر ومعاهم واين بريدج وسول كامبل العجوز.

خط الوسط كان عظيم بكل ما تحمله الكلمة من معاني ” جو كول وهارجريفز ومايكل كاريك ولينون وداونينج جيناس ومعاهم الأساطير الثلاثة ” ديفيد بيكهام وستيفن جيرارد وفرانك لامبرد، وفي الهجوم كان مايكل أوين من الجيل القديم والظهور الأول ثيو والكوت سيء الحظ جدا، وبيتر كراوتش اللي معملش أي حاجة ليها لزمة في حياته أصلا، والوافد الجديد والنجم الصاعد جدا واين روني”.

تشكيلة فعلا مرعبة، ولأول مرة من يوم ما شجعت إنجلترا نصعد دور ال16 أول مجموعتنا المجموعة التانية بفوزين على باراجواي وترينداد وتوباجو وتعادل مع السويد، ونلعب مع الإكوادور ونفوز عليهم بجون بيكهام التاريخي، وبعدين نلاعب البرتغال ” تاني ” في دور ال8 ونتعادل معاهم في الوقت الأصلي والإضافي بدون أهداف ونلعب ضربات جزاء اللي تنتهي بإننا ضيعنا 3 ضربات من 4 والبرتغال ضيعت ضربتين من 5 وأخر ضربة سجلتها البرتغال كانت بأقدام الوجه الجديد وقتها والصاعد كريستيانو رونالدو اللي كان بيلعب أول كأس عالم ليه، وودعنا البطولة كالعادة.

وفي 2010 عملنا بطولة زبالة وصعدنا تاني المجموعة بتعادلين وفوز ولبسنا 4 من ألمانيا في ال16، وفي 2014 خرجنا من دور المجموعات بعد ما اتغلبنا من إيطاليا و أوروجواي واتعادلنا مع كوستاريكا ويمكن العزاء الوحيد إننا خرجنا إحنا وإيطاليا.

وفي اليورو 2004 خرجنا من الدور التاني على ايد البرتغال ” عقدتنا الأزلية” بضربات الجزاء ” كالعادة” وفي يورو 2008 ما صعدناش أصلا للبطولة، وفي ويورو 2012 خرجنا من الدور التاني بضربات الجزاء قدام إيطاليا، وفي يورو 2016 خرجنا من الدور التاني برضوا بهزيمة تاريخية من ايسلندا 2-1، واظن كفاية كده لأني تعبت واتقلبت عليا المواجع.

بس في النهاية احنا في السيمي فاينال يا انجلترا ياحب العمر كله