بص يا عمنا في تاريخ الأرجنتين أتنين كاس عالم الأول سنه 1978 في المونديال اللي اتلعب على أراضي الأرجنتين والتاني 1986 واللي اتلعب في المكسيك، وسبحان الله مونديال 78 كان مفروض أصلا يتلعب في المكسيك لكن ما علينا المهم إن مفيش بطوله من دول الأرجنتين فازت بيها بشكل شرعي تمام وتعالي أحكيلك.

طبعا فضيحة مونديال 78 بيلخصها الناس في ماتش بيرو والأرجنتين اللي خلص 6-0 لصالح الأرجنتين والمفروض عن ده كان في الدور التاني واتأهلت منه الأرجنتين للنهائي علشان تلاعب هولندا، لكن الحقيقة هي الفضيحة أكبر من كده بكتير بقى.

أولا مبارايات الأرجنتين كلها كانت بتتلعب باليل على الأضواء الكاشفة وبكده بيهربوا من الحراره والرطوبة العالية وكمان إنهم بيعرفوا نتايج كل المبارايات الأول وبعدين يلعبوا ودي كانت مصيبة، الارجنتين بتتأهل تاني مجموعتها ومعها إيطاليا أول المجموعة والمجموعة دي كان فيها المجر وفرنسا.

ماتش فرنسا والأرجنتين اللي انتهي 2-1 لصالح الأرجنتين كان بيشهد عار تحكيمي مالوش حل، خصوصا لما اتحسب للأرجنتين ضربة جزاء من الهوا وما اتحسبش لفرنسا ضربة جزاء صريحة وواضحة، ولولا الماتش ده تقريبا ما كنتش الأرجنتين صعدت للدور التاني.

عموما كان في أسوأ أنظمة للعب المبارايات في كأس العالم في الفترة دي، الفرق المشاركة بتتقسم مجموعات وبعدين يصعد الأول والتاني من كل مجموعة، 16 فريق بيتقسموا 4 مجموعات يصعد 8 فرق يتقسموا مجموعتين، أول كل مجموعة بيروح يلعب في النهائي والتاني من كل مجموعة بيلعب على التالت والرابع.

المهم مجموعة الأرجنتين في الدور التاني كان فيها ” الارجنتين والبرازيل وبيرو وبولندا، بيرو كانت عاملة مونديال هايل يكفي اقولك إنها أصلا صعدت الدور التاني في المركز الأول ووراها هولندا في المركز التاني، صحيح هولندا كانت استثنائية في الدورة دي خصوصا إنها بتلعب من غير نجمها التاريخي يوهان كوريف اللي رفض السفر للأرجنتين لأسباب سياسية في المقام الأول ولأنه اتهدد هو عائلته بالخطف والقتل لو راح الأرجنتين في المقام التاني، لكن هولندا قدرت تسد وتسد أوي كمان.

المهم في الدور التاني الارجنتين لعبت البرازيل وتعادلت ولعبت مع هولندا وفازت وكذلك البرازيل اللي لعبت وفازت على بيرو وبولندا وفاضل ماتش واحد الارجنتين وبيرو، الفوز بس يخلي الارجنتين تتساوي في النقط مع البرازيل لكن البرازيل هي اللي تصعد بفرق الأهداف، والحل الوحيد علشان الأرجنتين تصعد للنهائي هو إنها تفوز على بيرو 6-0.

رقم كبير جدا خصوصا في الدور التاني من البطولة ومع فريق زي بيرو وقتها اللي كانت عامله بطولة هايلة، ويتلعب الماتش ويخلص الشوط الأول 2-0 للأرجنتين.

قمة العار بقى بيحصل بين الشوطين، لما بينزل الديكتاتور الأرجنتيني فيديلا لغرفة لاعبي بيرو ويعمل اتصالات بالحكومة البيروفية ويوعدهم بمعونات غذائية وكمان يوعدهم بإطلاق سراح عدد من المواطنين البيروفيين في السجون الأرجنتينية مع شوية فلوس للعيبة بعد التهديدات الصريحة.

تنزل بيرو الشوط التاني وتحصل المعجزة الملعونة، الأرجنتين بقدرة قادر تجيب 4 اهداف في شوط واحد علشان تنتهى المباراة 6-0 وتوصل الأرجنتين للنهائي وتلاعب هولندا اللي كسبتها بفضل مهارة الاعب الارجنتيني العظيم كيمبس اللي جاب جونين في النهائي ده وفض كمان التحكيم اللي انحاز جدا للأرجنتين وتكسب الأرجنتين أول كأس عالم، وكان الغرض هو التغطية على الكوارث اللي بيقوم بيها نظام فيديلا اللي وصلت إن في 30 ألف ارجنتيني أختفوا أو اعتقلوا أو اتقتلوا في 5 سنين بس.

نروح بسرعة لكأس العالم 86 في المكسيك، الأرجنتين ومعاها ساحرها التاريخي العظيم وأحد اعظم لاعبي الكرة في التاريخ ديجو أرماندو مارادونا، البطولة دي كان فيها تغيرات كتيره منها إن المنتخبات المشاركة 24 ودي كانت تاني بطولة تتلعب بالعدد ده بعد كأس 82.

والأهم إنه اتعدل النظام العقيم اللي اتلعب سنه 82 في الدور التاني لما كانت الفرق اللي بتصعد من المجموعات الستة بتتقسم لأربع مجموعات كل مجموعة 3 فرق ويلعبوا بنظام المجموعات والأول هو اللي يصعد المربع الذهبي ويكمل، في بطولة 86 الوضع اختلف أخيرا فعلوا نظام افضل 4 فرق في المركز التالت من المجموعات ال6، واخترعوا دول ال16 وبعديه دور ال8 وهكذا.

المهم مجموعة الأرجنتين في 86 كان فيها إيطاليا وبلغاريا وكوريا الجنوبية، صعد منها الأرجنتين أول وإيطاليا تاني وبلغاريا تالت، علشان تلبس الأرجنتين في دور ال16 مع الأوروجواي علشان تكسبها 1 صفر بجون باسكيول في الشوط الأول، لكن فوز الأرجنتين حطها وش لوش مع إنجلترا اللي أصلا في الحقيقة كان في حرب عسكرية بين الارجنتين وبريطانيا وهي حرب جزر الفوكلاند.

ماتش الأرجنتين وإنجلترا في دور ال8 كان هو أكتر ماتش الناس مستنياه في البطولة والكوكب كله حاطط إيده على قلبه لايقلب مجزره، وفعلا قبل الماتش كان في خناقات بين المشجعين الإنجليز والأرجنتينين وكانت مدعكة في المكسيك.

أنجلترا كان عندها كالعادة جيل تاريخي خلينا نقول شوية اسامي على خفيف كده في حراسة مرمى انجلتر بيتر شيلتون وفي الدفاع جاري ستيفنز وكيني سانسوم وفي خط الوسط كان في برايت روبنسون وكريس وادل  وجلين هودل وكل دول معاهم الهداف والمهاجم العظيم جاري لينكر.

الأرجنتين بقى كان معاها أعظم جيل لعب كورة في تاريخها طبعا مارادونا، لكن كمان كان معاها بومبيدو حارس مرمى لويس براون و لويس كوجوفو وروجيري في الدفاع وفي خط النص سيرجيو باتيستا وهيكتور إنريكي وجوستي والرائع العظيم بوروتشاجا والعظيم فالدانو، جيل ما بيهزرش وفعلا امتع جيل لعب بقميص الارجنتين في تاريخها.

في الماتش اللي كان فعلا في خشونه غير طبيعية من اللعيبة وكانت طبعا منصبه على النجمين الإنجليزي جاري لينكر والأرجنتيني مارادونا، مارادونا بيسجل الهدف الأول بالإيد، ايوه بيسجله بإيديه وحكم المباراه بيروح للمساعد اللي بيأكد صحه الهدف ويتحسب الهدف، في الدقيقة 51 من الماتش بعدها ب 3 دقايق، مارادونا بيثبت إنجلترا والعالم بمطواه  ويفتح كتاب التاريخ ويستكنيص ويقعد فيه كده للأبد خالد مخلد بهدفه الأسطوري اللي رقص فيه 7 لعيبة من إنجلترا بما فيهم بيتر شيلدون شخصيا وبيحط الجون التاني.

بعدها إنجلترا قدمت اعظم دقايق للمنتخب الإنجليزي في كأس العالم في تاريخه اللي بتترجم لهدف العظيم جاري لينكر في الدقيقة 80 وكانت إنجلترا اقرب للتعادل لكن الدفاع الجيد وخشونة الارجنتين في اللعب وطبعا جون مارادونا حرمت إنجلترا من الصعود للمربع الذهبي.

بالمناسبة جون مارادونا اللي بإيديه لو ماكنش اتحسب بنسبه كبيرة الارجنتين كانت خرجت من دور ال8 على ايدي إنجلترا ، خصوصا لما تبص لمبارة دور ال4، اللي اكتسح فيها مارادونا بلجيكا بثنائية قبل ما يلعبوا النهائي قدام ألمانيا ويفوزوا 3-2.

بالمناسبة جاري لينكر هو هداف البطولة دي برصيد 6 اهداف منهم هاتريك في بولندا في الدور الأول، وطبعا مارادونا خد جايزة أحسن لاعب.