اهداف ذاتيه بالجملة في مونديال روسيا 2018، لاعب من المغرب بيحط الكورة في جونه بالغلط فتكسب إيران ولاعب من ايران يحط الكورة بالغلط في جونه فتكسب اسبانيا وطبعا جون أحمد فتحي اللي جه بالغلط في مرمنا فكسبت روسيا بعد ما زودت هدفين عليه، المهم كل دول اهداف ذاتيه لكن اغلى هدف ذاتي في العالم هو هدف المدافع الكولومبي اندرياس اسكوبار في مرماه في مونديال 94 في أمريكا في ماتش أمريكا وكولومبيا اللي خلص بنتيجة 2-1 لأمريكا وبسببه ودعت كولومبيا البطولة.

طبعا الغالبية العظمى من الناس عارفه قصة الهدف والاتنين اللي قتلوه وهما عمالين يصرخوا جوووووووووول مع كل طلقة من ال6 اللي سكنه في جسمه، لكن حد يعرف هو أتقتل ليه، أو أيه اللي خي جمهور فريق كرويا زي كولومبيا مالوش تاريخ في كأس العالم يقتل اللاعب المصنف على أنه افضل مدافع في تاريخ كولومبيا، طب تعالي اقولك.

سنة 1993 وتحديدا في 15 أغسطس كان في مباراه ضمن التصفيات المؤهلة لكأس العالم في أمريكا اللاتينية بين الأرجنيتن وكولومبيا الارجنيتن كانت كسب كاس العالم 86 ووصلت لنهائي كأس العالم 90 فأنت بتتكلم عن فريق بلغة الكورة عملاق، ده كان فيهم مارادونا الي كان لسه بيلعب كورة مع المنتخب وقتها لكنه مالعبش مباراة كولومبيا وكان بره التشكيل.

المهم في المباراه دي اللي أقيمت في كولومبيا بتحصل مفاجأة وبتفوز كولومبيا 2-1 على الأرجنتين، وبتروح تلعب مباراة العوده في بوينس إيريس في الأرجنتين وكل فريق عنده 7 نقط وكولومبيا الأولى في ترتيب المجموعة اللي كان فيها بيرو وباراجواي كمان بفرق الأهداف التعادل يأهل كولومبيا لكأس العالم من غير ما تلعب الملحق اللاتيني مع استراليا وطبعا الفوز يأهلها.

قبل المباراه قال مارداونا طبعا هانفوز على كولومبيا الارجنتين أكبر من كولومبيا في كل حاجة، ونسي فكرة الحلم، وتبدأ المباراة وتتروق الأرجنتين، تتروق ايه دي يتحط عليها حطه شامي ومغربي وتتهبد 5-0 وكان نجم المباراه دي بلا منازع المهاجم العظيم فوستينو اسبريلا ومعاه أدولفو فالنسيا اللي علموا الارجنتين درس عمرهم ما ينسوا في الكورة، وتتأهل كولومبيا للمونديال مباشرة.

المهم قبل المونديال يطلع بيليه ويقول تصريح عجيب غريب مش مفهوم وهو ويرشح كولومبيا للفوز بكأس العالم – مش وسعت منك دي شويه يا عم بيليه- عموما بيليه أصلا معروف ان له تصريحات عجيبة كتير لكن التصريح ده تحديدا كان كارثة.

بعد تصريح بيليه اغلب مشجعين الكورة الكولومبيين أجتاحوا مكاتب المراهنات، ولما نقول كولومبيا لا مش الدنيا تقوم تسمعنا ولا حاجه، لما نقول كولومبيا يعني عصابات تجارة المخدرات في العالم، اللي طبعا شاركوا في المراهنات بمبالغ فلكيه، لان بيليه قال كولومبيا ها تأخد الكأس، وكأنه نبي بس ما علينا.

وعلشان ما نحكيش كتير خليني أقول إن كولومبيا اتحط عليها جامد أول ماتشين تخسر من رومانيا 1-2 وعصابات المخدرات تبعت تهديدات للاعيبه يا تفوزوا في ماتش أمريكا يا ها نقتلكوا وتنزل اللعيبة تلعب تحت ضغط وهوبا اللعب يحب اللعب ولان الأخطاء هي سمه كرة القدم اندرياس اسكوبار بيجيب جون في نفسه وعادي بيكملوا لعب وهو أمريكا تخطف التاني وهو كولومبيا تجيب جون ورسميا كده كولومبيا بره كأس العالم – مبسوط يا بيليه-.

بتلعب كولومبيا مباراة تحصيل حاصل قدام سويسرا وتكسبها 2-0 وترجع البعثة الكولومبية إلى الأراضي سالمه، ويستخبوا اللعيبة في بيوتهم ويحاول أندرياس اسكوبار يقنعهم إنه مفيش حاجة يا جماعة والكورة مكسب وخسارة ولازم نواجه الناس اللعيبة بترفض هو كان عنده من الشجاعة ما يكفي إنه خد عربيته ونزل بار وهناك الناس طردته شر طرده، وهو خارج اتقتل بالطريقة اللي حكيناها.

بعد موت اسكوبار 14 نادي من 18 نادي في كولومبيا بيعلنوا افلاسهم لان بقى في تشديدات على موضوع المراهنات وعلى استثمارات عصابات المخدرات في كولومبيا واتقبض على واحد من اللي قتلوه واتطس حكم 43 سنه سجن لكنه خرج بعد 11 سنه بس حسن سير وسلوك، وكان فيه إشارات لعدد من تجار المخدرات ورا الموضوع.

الإتحاد الكولومبي منع إرتداء القميص رقم 2 اللي هو كان قميص اسكوبار تخليدا لذكراه لحد ما جه إيفان كوردوبا ولبس القميص تاني، وبالمناسبه اسكوبار كان مفروض رايح يلعب في صفوف ايه سي ميلان الإيطالي، لكنه اتقتل قبل ما يروح في واحده من ابشع جرايم كورة القدم.