يوم 27 يونيو سنه 2016، في بلدي الصغننه خالص في شرق مصر ومركز شباب كنت قاعد بتفرج على ماتش لمنتخب إنجلترا فرقتي المفضلة جدا جدا جدا، والناس اللي حواليا كانوا قاعدين بيتفرجوا عليا أنا، لان ببساطة فرقتي كانت بتتفضح حرفيا من منتخب ايسلندا اللي اول مرة يشارك في أمم أوروبا في تاريخه.

بصفتي مشجع مصري لمنتخب إنجلترا فانا أصلا شخص مش مفهوم للناس اللي حواليه، الناس تشجع ألمانيا البرازيل البرتغال أسبانيا فرنسا هولندا الأرجنتين، الفرق اللي دايما مترشحه للبطولة دي، لكن محدش عاقل في الكون مش إنجليزي ها يشجع إنجلترا!!

أبسطهالك، الحكاية زي ما تبقى قاعد في قهوة وتلاقي واحد بيشجع إنبي أو بتروجيت أو الأسيوطي، يعني لا أهلي ولا زمالك ولا إسماعيلي ولا مصري واتحاد سكندري، ده راجل قاعد بيشجع الأسيوطي، أتمنى تكون فهمتني.

المهم على الورق كده وقبل بداية اليورو دي، منتخب إنجلترا لأول مرة يبقى مرشح حقيقي للبطولة، جيل جديد من الشباب الحريفة خد عندك رحيم سترلينج وراشفورد وجيمي فاردي وهاري كين وديلي ألي وغيرهم ومعاهم خبرة السنين واين روني، أسماء تخض لكن كعادة منتخب إنجلترا اللي عمره ما خذل جمهوره أبدا، بدأت البطولة وأكتشفت إني بشجع فريق تايه.

بصعوبه إنجلترا بتصعد دور ال16 تاني مجموعتها بعد تعادل مع روسيا 1-1 وفوز صعب جدا على ويلز 2-1 وتعادل محبط مع سلوفاكيا اللي كانت اول مرة تصعد اليورو 0-0، تصعد تاني المجموعة بعد ويلز ويصعد معاهم سلوفاكيا ضمن اربع فرق هما أحسن مركز تالت في المجموعات السته.

أما أيسلندا بقى اللي أول مره نسمع عنها في كورة القدم أصلا بتصعد تاني مجموعتها بعد تعادل تاريخي مع البرتغال 1-1، وتعادل مع المجر ” اللي صعدت أول المجموعة 1-1، وفوز اسطوري على النمسا في الوقت بدل الضايع 2-1، علشان تروح دور ال16.

ولان البطوله 24 فريق ففي أحسن مركز تالت دور ال16 له حسبه كده مش وقتها، بس خلينا نقول عن الحسبه دي حطت منتخب إنجلترا قدام منتخب ايسلندا اللي هو الماتش اللي كنت بتفرج عليه.

في الدقيقة 4، من أول هجمه لمنتخب إنجلترا حارس مرمى ايسلندا يعمل فاول مع رحيم سترلينج وهوب ضربة جزاء وهوب روني يخش يشوطها وهوب جون، وهيييييه وفرحه قويه بقى والله لسه بقول هييييييييييييه وبسقف لقيت ايسلندا بتلزق منتخب إنجلترا وبتلزقني شخصيا على قفايا بجون بيدل على إن المنتخب ده مش جاي يهرج وإن إنجلترا كالعاده لازم تطلع عين كل اللي بيشجعوها.

لدقيقتين بعد هدف المدافع الإيسلندي سيجوردسون في مرمى جوو هارت، مبقتش فاهم في ايه؟ ايوه يعني إزاى ده يحصل انا واحد متخيل إن إنجلترا ها تخش بالميت ها تشيل ايسلندا 3-0 وده علشان إنجلترا ها تلعب وحش كمان، لقيتنا متعادلين مع ايسلندا 1-1 في الدقيقة 6 من الشوط الأول.

والله لسه ما كملتش ومفاتش بتاع 10 دقايق ولقيت هجمه من أجمل ما يكون لأيسلندا بتخلص بإنفراد من راس الحربة الأيسلندي سيجبورسون علشان يلزق جوو هارت ومنتخب إنجلترا ويلزقني شخصيا الجون التاني، والدنيا أتقلبت، إنجلترا مغلوبة بفضيحة من منتخب لسه بيقول يا هادي في كرة القدم.

شوط ونص إنجلترا ما بتعملش حاجه غير إنها بتهاجم، بتهاجم بكل خطوطها فعلا ده جوو هارت نفسه كان ناقص يطلع يهاجم، بس فجأة حسيت إن المقاولين العرب بنت حيطه على منطقة جزاء ايسلندا، دفاع حديدي اسطوري من ايسلندا علشان يخلص الماتش وايسلندا تصعد دور ال8، اللي بتخسر فيه من اقوى فرق البطولة وقتها منتخب فرنسا المرعب 5-2 وتودع البطولة بعد ما تاخد لقب الحصان الأسود.

بعد يورو 2016 بتبدأ أيسلندا رحله التصفيات الأوروبية لكأس العالم، ايسلندا اللي لعبت 10 مباريات كسبت 7 وخسرت اتنين واتعادلت مرة وحيدة، بتوصل كأس العالم مباشرة بصفتها أول مجموعتها وبتحط الفريق الكرواتي القوي في مأزق الملحق الأوروبي اللي من رحمة ربنا بيه بيلاعب اليونان ويصعد هو كمان كاس العالم.

فجأة أيسلندا بقت حديث أوروبا فريق مغمور تماما بيصعد كأس العالم لأول مرة أول مجموعته على حساب تنين كروي اسمه كرواتيا بكل المورديتش والراكيتيدش اللي فيها، ويشاء السميع العليم إن أيسلندا وكرواتيا يبقوا سوا في نفس المجموعة مع الأرجنتين ونيجيريا وفر رايي ايسلندا هي المرشح الأول للقب الحصان الأسود في البطولة دي ومتوقع إنها ها تطلع لدور ال 16، ولو التوفيق كان معاها ما تلاعبش فرنسا في دور ال16 لانها لو لاعبت الدنمارك ولا بيرو ولا استراليا انا متأكد إنها ها توصل دور ال8.